Ngobrol dari Ciliwung: “Doel Sohib Makan Keredok”

0
571
ilustrasi

#CATATANJAKARTA  Taufan S. Chandranegara

“Mpok Mustaji, kayak seleb di tipi (TV).” Doel Sohib, senyum selalu.

“Tiga kali kecup Doel. Kayak iklan bumbu masak di tipi, noh.” Doel sembari memandang Ciliwung si cerah selalu.

“Musim ujan bakal dateng semoga kagak banjir ini Ciliwung.” Doel, bersenandung.

“Ngape lu Doel. Muke ente kurang sedetik tuh.” Empok Mustaji, langsung ngamprok duduk di samping Doel. “Mikirin Ramonah Doel.”

“Jiaah! Kagak Mpok. Doel seneng tapi setengah mikir.”

“Jiaah! Mikir jangan setengah Doel. Mikirin emas di Monas? Cakep tuh kopiah Doel. Marun warnanye. Kopiah baru ye!” Mpok duduk berpunggungan dengan Doel.

“Buka tuh keredok! Bumbunye keburu encer kagak enak. Keburu luntur tuh bumbu.”

“Nah, itu die Mpok. Luntur. Kayak bumbu.” Suara Doel cerah.

“Apenye luntur Doel. Emang lagi musim kelunturan kale.”

“Ke-setia-an Mpok.”

“Hihihi kayak judul pelem (film) Doel.” Empok Mustaji, memandang Doel, sejenak.

“Oh! Ramonah? Kagak bakal luntur. Ramonah pasti setia. Empok jamin 1000%”

“Banyak amat Mpok. Maksud ane pada setia nggak ya. Kan lagi pada musim rame neh. Rame sono. Rame sini. Rame doang pada ngapain ya Mpok.”

“Oh! Itu, lagi pade rame entuh Doel, by online.”

“Hah! Online? Cakep tuh bahasa sononye Empok. Jiee! Pasti gegara si Jali neh.”

“Oh. Bang Jali. Sip kalau itu Doel!”

“Jiaahh! Menyala amat itu suara.” Doel, seraya mendorong punggung Empok.

“Hahaha. Ane sebut name si Jali! Langsung! Nyetrum ya Mpok.”

“Kudu Doel! Apa lagi ame cakep nye. Jali-jali ini lagunya.” Empok, bersenandung.

“Hihihi! Bentar. Ane, cicip keredok dulu. Biar makin cakep kite ngobrol nye hehehe.” Doel seraya mencicip keredok. “Nyas! Nyis! Nyos! Rasanye.”

“Beda nih Mpok. Rasa keredok nye. Bumbu nye beda kale ye.”

“Top Doel. Jelas beda. Bumbu lama-bumbu baru. Itu keredok Doel. Beli nye di sono nye Pasar Baroe, sono nye Harmoni, lewat depan Istiqlal, kanan Katedral. Tikungan Monas, nyender di Gambir. Gerobak Keredok Baru. Itu name nye.”

“Oh! Ngarti hahaha. Abis liat ujung genteng rumah Bang Jali?”

“Ssst! Ane mau jadi pengamat Doel. Neh! Cobain juga Es Doger, Bang Matius, dari ujung Pasar Baroe.”

“Bentar Mpok. Hurff! Wah. Bener asyik. Tape nye bikin kendiri kayak nye neh. Eit! Berasa duren nye Mpok. Top banget. Baru juga neh?”

“Itu die! Cocok Doel?”

“Sip selalu Mpok. Ame perlu sabar. Nyari mutiara kudu nyelem dalem banget. Baru dapet asli nye Mpok.”

“Iye Doel! Berisik aje! Gemes Doel!”

“Eit! Jangan nyolot Mpok. Orang beriman dilarang nyolot. Sabar Mpok.”

“Gimana kagak nyolot Doel. Jadi ahli-tukang kritik. Boleh! Tapi jangan asal dong. Lembaga pengawas maling kan udeh ade. Keren lagi namenye-Corruption Eradication Commission. Ngawasin kite Doel. Melotot aje! Mantap Doel. Kagak asal teriak-teriask. Ngoceh-ngoceh. Kebakaran! Kebakaran! Terus kabur. Terus ngumpet!”

“Harga minyak dunia pada anjlok noh Mpok. Gegara si iblis kopit.”

“Lah! Covid Doel. Bahasa sononye. Bukan kopit tau! Biar kate covid. Tetep kudu waspada ame korupsi!”

“Eit! Cakep tuh Mpok. Asal cakep Empok nabrak aje nih!”

“Hihihi. Simak Doel. Kalau harga minyak dunia turun-naek. Nah loh, minyak kampung kite. Cakep nggak ye. Semoga beruntung.”

“Untung rugi nasib kite Mpok. Amin.” Doel, seraya memandang Ciliwung.

“Ayuk! Doel. Ketemu si cakep. Jali-jali dari Cikini Doel.” Mpok bersenandung lagi.

“Hahaha. Segitu getolnye Mpok. Kite naek getek aje ye. Udah lama kagak pantunan di atas getek Ciliwung.”

“Nggak salah Mpok. Kepasar Gambir naek getek.”

“Yuk! Berangkat ke Tanjung Priok. Pake baju penganten. Sebab mau ngeliat hidup baru Doel.”

“Jiahhh. Cakep bener Mpok ane. Die mau liat jambu apel neh hahaha…”

“Doel Sohib bareng Empok Mustaji. Selalu indah setiap hari.”

“Pantunan di getek Ciliwung. Bikin adem semua hati.”

“Ayo! Berangkat ke Pasar Baroe. Sejuk hati di hari baru.”

“Silat Betawi kudu di hati. Bikin cinta setengah mati.”

“Jangan maen timpuk batu. Mending kerja bahu membahu.”

“Nyok! Salaman. Bersatu! PSBB, bikin hidup girang selalu.”

Betawi Indonesia, September 19, 2020.